De Bergantiños á Catedral

De Bergantiños á Catedral

De Bergantiños á Catedral

22/07/2017

Se nos situamos na compostelá Praza do Obradoiro, mirando cara a fachada da Catedral, veremos ao Apóstolo Peregrino, no medio das dúas grandes torres, a da Carraca e a das Campás. Mesmo nesa torreta intermedia está a urna de Santiago, que, nalgún tempo, estivo dourada.

Entremos na basílica. Diante nosa, o Pórtico da Gloria. Recíbenos sorrinte un Santiago policromado, acolledor de tantos peregrinos que por alí entraron. Se miramos para o arco da dereita, outra vez o Apóstolo, con San Pedro, San Xoán e San Paulo. Sigamos. Fronte nosa, ao fondo, Santiago sedente, presidindo. Leva bordón na man esquerda, escravina arxéntea. Moitos devotos suben por una estreita escaleira para darlle o seu abrazo.

No baldaquino, sostido polos brazos de robustos anxos un Santiago Cabaleiro. Esta mesma imaxe está nos dous brazos do cruceiro. No da man esquerda, unha talla do famoso escultor Gambino. No da man dereita, un relevo pétreo que foi do claustro que había no século XII.

Deixamos atrás o Panteón Real ou Capela das Reliquias. Hai un Santiago Peregrino, de prata, figura menor, que levan nas procesións. Digamos tamén de paso que alí está o sartego do famoso Conde de Traba, bergantiñán do século XII, amigo de Xelmirez.

Sigamos agora pola xirola. Sobre a man dereita, a capela do Pilar. Alí está o Apóstolo de xionllos ante a Virxe do Pilar. Pasamos por diante da Porta Santa. Está pechada, pero na entrada, polo exterior, ten o Peregrino, por donde entran tantos devotos nos Anos Santos.

Saímos pola porta que chaman da Acibechería. Ten a fachada máis nova, do século XIX, de discutido gusto. No cumio hai un Santiago Peregrino.

De volta a Bergantiños pasaremos por terreo pertencente á parroquia da Peregrina onde Nosa Señora bendicía ós bergantiñáns que ían a pé a Compostela.

Tamén pisaremos a parte sur da parroquia de Santiago de Buxán que é a freguesía máis preto de Compostela, se miramos en liña recta.

Finalmente, atravesaremos o concello de Dubra, que foi Terra de Santiago e por iso leva a urna do Apóstolo no seu escudo.

Xa en Carballo, preto queda Sísamo onde hai columnas románicas, Santiago Peregrino, Cabaleiro, e urna do Apóstolo na fachada.

Descansemos