Vai vestido de peregrino a Compostela. A súa terra do sur de Francia era Camiño de Santiago. Ser peregrino era unha condición que respectaban os políticos, os estados, os mosteiros, igrexas e hospitais.
San Roque foi invocado ante tanta epidemia que había nos séculos do medievo e tempos posteriores. Facían votos nas cidades e vilas, comprometíanse a venerar a memoria do santo para sempre, se había remedio para aqueles males.
Santiago, Betanzos, Vilagarcía, entre outras, teñen o Voto a S. Roque, que van cumprindo, pero sen a solemnidade e devoción doutros tempos.
San Roque ten no folklore galego cancións que falan do santo e do seu can. Viva S. Roque e o can, din.
A imaxe do santo é levada pola mocidade en Vilagarcía. Como apretaba o Sol, os mozos empezaron a pedir auga e a xente daba de beber. Pediron máis auga ós que miraban desde os balcóns, e guindaban mesmo caldeiros de auga sobre os portadores e acompañantes da imaxe do santo.
Pedían máis auga e así temos a chamada Festa da Auga, que recorda aquela “tomatina” que hai aló polo sur de España. Unha estragación de tomates, tan sabrosos como son.
Agora en Vilagarcía xa son as motobombas do Concello as que xeringan auga ás moitedumes.
Ben sabemos que a auga é un ben escaso, que fai moita falta para apagar o lume no monte, sobre todo, nos veráns. En África hai xente que morre de sede por non ter auga doce, limpa.
Teremos que ler a encíclica do papa Francisco para ver que nos di do aproveitamento da auga e de canto nos pide o deber de séremos coidadores da Casa Común, que é o noso planeta.